Intruder (1989): Anmeldelse – Slasher og splatter-magi!

Intruder (1989) er den puraste slasherfilmen eg har sett sidan The Midnight Stalker! Alt eg synest ein slasherfilm skal ha, er i denne skrekkfilmen. Eg blei nesten lei meg for at eg aldri fekk sett denne då eg var 14 – slik at filmen kunne ha fått ein indre legendestatus. Men, betre seint enn aldri!

Klistrelappen «dødsdømd» i panna

Handlinga er superenkel: Ein dritgjeng tilsette jobbar natt på ein stor lagerbutikk. På utsida står det ein psykopat som gjerne vil inn, og inn kjem han!

Men før splatteren startar får vi nokre artige scener kor vi blir kjende med karakterane. Sjefen, som sit for det meste på kontoret og tek seg av forretninga, fortel dei at supermarknaden skal leggast ned og at alle mistar jobben. Gjengen er for det meste unge og kåte ungdomar som har klistrelappen “dødsdømd” festa i panna og er klare til slakt!

Introduser, isoler, splatter, og finale

Etter litt lett kjennskap går Intruder over til rein ein-etter-ein slashing med herleg gore og praktiske effektar. Dette er for meg den perfekte formelen: introduser, isoler, splatter, og finale. Ein skulle tru dette er ei enkel oppskrift, men det er veldig få som får dette til skikkeleg.

Men regissør Scott Spiegel er ikkje kven som helst. Han var med på å skrive manus til Evil Dead II og var nær venn med Sam Raimi. Apropos Raimi, både Ted og Sam Raimi spelar her i filmen, og Bruce Campbell har ei lita cameo-rolle! Dette er ein ekte vennegjeng-film!

Kreativitet trumfar stort budsjett

Intruder skrik Raimi gjennom heile filmen. Det er stappa med rare kameravinklar og litervis med blod. Her er sær humor og ein fantastisk B-film-sjarm slik eg elskar med The Evil Dead og Evil Dead II. Med eit budsjett på berre 130 000 dollar, har Spiegel brukt kvar ei krone meir enn vel nok, og beviser at ein ikkje treng eit stort budsjett for å lage ein god skrekkfilm så lenge ein har kreativitet og god sans for humor!

Filmen er basert på ein 8mm kortfilm kalla Night Crew, mekka av Spiegel. Filmen blei laga under Empire Pictures som Filmloftet er veldig glad i. Selskapet som blei skapt av 80-talslegenda Charles Band.

Greg Nicotero med sitt selskap KNB EFX Group står bak make-up og all gore. Eg var litt redd for at filmen kom til å svikte på gore-fronten, men for kvart eit kill blei det meir blodig og grafisk enn det førre. Kor eg kosa meg!

Spol tilbake!

Eg gir full karakter – ikkje fordi filmen i seg sjølv er så fantastisk, men fordi den leverer akkurat det eg vil ein slasher skal vere: ein blodig og kort splatterfilm med den enklaste oppskrifta. Dette var ei av Spooktobers største overraskingar. Best av alt: filmen ligg gratis på YouTube i ein Director’s Cut! Eg fekk utruleg lyst til å springe ut i skauen med eit kamera, ketchup og nokre villige sjeler og skyte ein eigen splatter. Med andre ord: eg blei inspirert!

Terminal-pila: ◀◁