VHS-PARADIS

Videosjappa

Videosjappa heime: ei bakdør inn til den lokale matbutikken. Der det vart servert burger med pommes frites og pølse med stappe over disken. I hjørnet stod det store skap med glasdører. Viss vi ville kikke nærare på dei freistande omslaga, måtte damene som jobba der kome bort og låse opp for oss. Den tunge lukta av frityr og støv hang i den tjukke plasten. Sjølv i dag kan eg framleis kjenne lukta av eit video-omslag frå om lag 1982. Å stå der framfor hyllene og plukke ut underhaldninga for kvelden, var rein magi.

Det er akkurat denne kjensla – lukta av videosjappa og magien frå 80-talet – som gjorde meg til fast gjest på nettsida NorskVHS i over eit tiår. Der hadde eldsjela Alf Harald bygd opp eit heilt rått arkiv av skanna omslag frå gullalderen til videomarknaden. Han delte lidenskapen sin for skrekk, sci-fi og galne B-filmar med oss alle, og la ned ein enorm innsats i å ta vare på denne biten av kulturarven vår.

Warner Bros VHS Videokatalog James Bond
Videokatalogar frå videosjappa som låg på disken. Dette er Warner Home Video-katalogen (frå NorskVHS).

VHS-ARKIVET

Her på Filmloftet, inne i VHS-arkivet, kjem eg framover til å dele eit handplukka utval av dei tøffaste og mest stemningsfulle VHS-omslaga frå samlinga hans – dei som verkeleg snakkar til meg. Dette er ei hyllest til Alf Harald, til Videovest (videosjappa eg voks opp med), og eit forsøk på å halde videodraumen i live. Med meg i sjappa, og på plass som fast gjesteskribent, har eg barndomskompisen min Thor «Ator» Dahlstrøm.

Videoselskap

Esselte, Mayco, Hem Video, Novio, Walthers Video, Cinehollywood. In Video, Fram Film (FF), Kommunenes, Filmcentral (KF). OVC. CP Entertainment, Intervideo, CCV (Club Consult Video), Techno Film – Frekvensia, Warner – Polygram. Nord Video. VCM (Video Cassette Marketing), Juno, Videohuset.